細個嗰陣，差唔多每逢星期三晚就會偷偷地扭開收音機聽跑馬，但有時候會收得唔清而要校多幾次台。記得有一次因為咁轉咗去隔籬台，無意中聽到有個人（係節目主持？嘉賓？）講，有啲人同另一半拍拖嗰陣，會因為自己內心焦慮不安而嚴格控制對方嘅一舉一動。第一次聽到呢番說話嘅時候，我大約得七、八歲，當然完全唔明白箇中嘅含意，仲因為知道個節目肯定同跑馬無關而快快手轉台，但大大吓發覺，呢個世界原來真係有呢類人，而且為數都唔少。
簡單嚟講，有啲人會用自己冇安全感呢個「理由」嘗試合理化所有嚴控伴侶嘅行為，輕則唔准另一半用社交軟件同其他人傾計嗰陣加插任何表情符號（因為佢哋可能將加插 emoji 同調情劃上等號）、限制另一半同其他人傾計嘅內容同時間等等，重則定時定候審問對方、強迫佢哋解鎖 check 手機，甚至硬性規定唔准同邊個邊個有任何聯絡（但佢哋嘅伴侶未必可以用同一標準要求番佢哋咁做）。
如果畀極冇安全感嘅人發現伴侶喺社交媒體 follow 咗某啲人，甚或讚好人哋嘅 post，佢哋會一律當成係對方出軌（勾結外部勢力）嘅「罪證」。就算佢哋搵唔出咩所謂嘅「罪證」，佢哋都可以用「有罪假定」嘅思維要另一半證明番自己冇出軌嘅動機同行為。唔知呢種現象係咪就係國安法下嘅香港新常態？
文章原載於《信仰百川》